Dastoor Bachao, Mulk Banao: Gulbarga me All India milli council k Quami Convention ke talluq se Jalsa; Dr Manzoor Alam aur Deegar amaideen ki Sheher me aamad

Gulbarga 8 July Press release: Dr Mohammad Asghar Chulbul Vice president Milli council, Zila Gulbarga ke press note ke mutabiq Qaumi convention All India Milli Council ka ijlaas ba unwaan “Dastoor bachao,Mulk banao” ke zimn mein batarikh 9 July bawaqt 2 baje din bamuqam Shadaab function hall, Ring road, Gulbarga Zair Sadarat Alhaj Qamar-ul-Islam sahab baani rukan All India Milli Council, Rukn Assembly Gulbarga Shumal o sabiq wazeer Karnataka, minjaanib All India Milli Council zila Gulbarga aik ahem ijlaas munaqqid kya ja raha hai.

Mehmanan khusoosi ki haisiyat se Taqaddus ma’ab Hazrat Alhaj Dr Syed Shah Gesu Daraaz Khusru Hussaini Sahab sajjadah nasheen, Dargaah Hazrat Khwaja Bandah Nawaz , Gulbarga shareef, Hazrat Maulana Abdulhakeem Mughaisi Sahab, Sadar All India Milli Council , Nai Dehli , Dr Manzoor Aalam Sahab General Secretary All India Milli Council Nai Dehli , Hazrat Mufti Ashraf Ali Sahab Naib Sadar All India Milli Council , Ameer Shariat Karnataka, Aur Janab Raheem uddeen Ansari, Hyderabad, Naib Sadar All India Milli Council shirkat farmaenge.

Dr Md Asghar Chulbul ne Zila Gulbarga ke tamam Danishwaran, Sajjadgaan, Mashaekheen, Ulama e Karam e millat , Mufakkiran islam,Humdardaan e Qoum o Millat, tamam masajid ke aima Karaam, Masajid ki intizami committees ke Sadoor wakala Doctors Engineers, awaami tanzeemon k zimma daraan, samaji karkunaan, muntakhib numaido, sabiq Corporators waghera se par zor appeal ki hai ke voh is ijlaas mein zaroor shirkat karen .

Dr Mohammad Asghar Chulbul ne apne sahafti bayan jari rakhtay hue kaha hai ke Mulk ke mojooda halaat se aap bakhoobi waaqif hain. 3 saal qabal Centre BJP ke Iqtidaar par anay ke baad jo halaat paeda hue hain woh nah sirf muslim dushmani par mabni hain balkay un se Mulk ke dastoor ko zabardast khatrah la-haq hogaya hai. Mulk me continously paish arhay mob lynching (yani hajoom ke tashaddud) mein musalmanoon ke qatal ke waqeat nihayat tashweesh naak hain. aqliton aur deegar pasmandah tabqaat aur Dalito ko bhi tashadud aur nafrat ka nishana banaya ja raha hai.

Dehli High court ke sabiq Chief justice Rajendra Sacharji ka Mulk ke mojooda halaat par yeh tabsarah nihayat tawajah talab hai ke hate crimes yani nafrat par mabni juraim mustaqil badhatay jarahay hain aur agar hum ne unhein nahi roka aur musalmanoon se minority ke tag ko hataden to hum aqwam mutahidda ke rukan nahi reh saken ge .

In tashweesh naak halaat mein All India Milli Council ne Mulk ke Tamam insaaf pasandon ko sath lekar “Dastoor Bachao Mulk Banao” ke zair unwan aik qaumi convention Munaqid karne ka elaan kya hai. yeh Convention 30 July 2017 Sunday ko bamuqam Taal Katorah indoor Stadium, New Dehli me munaqqid hoga.

Jis mein mukhtalif mazahab ke peshwa, Danishwaran e Mulk o millat, qaumi,Milli tanzeemon aur jamato k qaideen, zimma daraan, Aaeni o jamhoori eqdaar aur insani haqooq Ki jung larnay walay jehedkar shirkat karenge. convention mein Mulk ko ghalat raah par le jane walon ke khilaaf mutahidda sadaye ehtijaj buland ki jaye gi aur Mulk ke Dastoor, Qanoon, Adliya ki baala dasti ko bahaal karne jame mansoobah banaya jayega. neez Mulk mein mazhabi rawadari aur khaer sagali ko badhawa dene k irade se convention mein Mulk bhar se hazaron mandoobeen shirkat kar rahe hain.

All India Milli Council ke baani Rukn Quaid Mohtaram Dr Alhaj Qamar Salam Sahab Sabiq Wazeer ki Qayadat mein Zila Gulbarga se bhi mandoobeen ki shirkat ko yakeeni bananay ke liye ijlaas mein ghor kya jaye ga. baradran millat se is ijlaas mein shirkat ki darkhwast ki gayi hai.

 

Comments
Facebooktwittergoogle_plusredditpinterestlinkedinmail

Leave a Reply

Facebook